Ալավերդու բնակիչ Գոհար Մանուկյանը մինչև պատերազմի սկսվելը չի իմացել, որ իրենց շենքում ապաստարան կա, և անհրաժեշտության դեպքում կարող են այնտեղ պատսպարվել։ Երբ Հայաստանում ռազմական դրություն է հայտարարվել, և բնակչությանը սկսել են ծանուցել օդային տագնապ երևույթի մասին, տիկին Գոհարն էլ, շատերի նման, անհանգստացել է։

Հայաստանում հաստատված ռազմական դրությունը համապատասխան կառույցների, մասնավորապես համայնքապետարանների և ԱԻՆ ստորաբաժանումների համար, վաղուց մոռացված ապաստարանները վերանայելու խնդիր է առաջացրել։ Ուշադրության կենտրոնում են հատկապես շենքերի տակ կառուցված ապաստարանները։
Ալավերդու այն տարածքները, որոնք պոտենցիալ ապաստարան են համարվում, մաքրվել ու բարեկարգվել են ռազմական դրություն հայտարարելու օրվանից սկսած,-ասում է Ալավերդի համայնքի ղեկավար Սասուն Խեչումյանը:

Հիմնական ապաստարանների տարածքը մեծ է։ Ու թեպետ դրանք դեռևս կահավորված չեն, բայց անհրաժեշտ որոշ աշխատանքներ (լուսավորության համակարգի կառուցում, մշտական ջրով ապահովում և այլն) այնուամենայնիվ արվել են։ Ինչ վերաբերում է նկուղի վերածված ապաստարաններին, ապա, ըստ համայնքապետի, դրանք հիմնականում լավ վիճակում են, մեծ մասի դեպքում նաև լուսավորություն կա, և դրանք պատերազմի պայմաններում պետք է հասանելի լինեն տվյալ տարածքում ապրող բոլոր բնակիչների համար։

Համայնքապետարանը ապաստարանների գտնվելու վայրի և օդային տագնապի դեպքում բնակիչների գործողությունների մասին նրանց իրազեկում է տարբեր մեթոդներով։ Նախ շենքերի պատերին և տեսանելի այլ վայրերում ծանուցումներ են փակցրել, նաև օդային տագնապ երևույթի վերաբերյալ տեղեկատվական բուկլետներ բաժանել։ Համայնքապետարանի հետ աշխատում է ԱԻՆ Թումանյանի փրկարարական ջոկատը, նաև՝ դպրոցների զինղեկները։

Ալավերդի խոշորացված համայնքի կազմում գտնվող 7 գյուղական բնակավայրերում բնակիչների համար, ըստ համայնքապետի, որպես ապաստարան կարող են ծառայել սեփական նկուղները։ Բայց կան գյուղեր, որոնք նաև առանձնացված տարածքներ ունեն ապաստանելու համար։