Այգեհատի դպրոցն իր փոքրաթիվ աշակերտներով Լոռու մարզում միակը չէ: Կան դպրոցներ, որտեղ ավելի շատ ուսուցիչ կա, քան աշակերտ: Լոռու մարզպետ Անդրեյ Ղուկասյանի խոսքով՝ դրանք այն բնակավայրերի դպրոցներն են, որտեղ բնակչության թիվը նույնպես փոքր է, հետևաբար նորմալ է, որ դասարանները երկկոմպլեկտ ու եռակոմպլեկտ լինեն:

«Այլընտրանք չկա, մենք չենք կարող դպրոցը փակել: Բնական է, որ կրթության որակը տուժում է, բայց ավելի լավ է այսկերպ, քան՝ դպրոց չլինի: Չի բացառվում, որ հետագայում լինի այնպիսի մոտեցում, որ տվյալ գյուղի երեխաները հարևան գյուղում դպրոց գնան: Բայց այս մոտեցումն առաջին հերթին պետք է լինի բնակիչների կողմից, որովհետև հիմնականում նման խոսակցություններին շատ բացասական ու բուռն են արձագանքում: Ներկայում ոչինչ չենք կարող անել, բայց նման դպրոցների խնդիրը մեր խոշորացույցի տակ է»,-ասում է մարզի ղեկավարը: